පුතේ නුඹ නමට තැනූ බිම මත
අලුත් මල් දැන් පිපෙනවා
දනන් ඇවිදින් මල් අතර සරනවා
මල් පුසුඹ විඳිනවා
හරි හැඩයි කියනවා
නුඹට පෙවු යදම් ගුළි
මගේ හෘදය
තවම ගිනියම් කරනවා
කෙවෙනි අද්දර නොනිදා ගලන
කදුළු උණුසුම දන්න
හදවත් පත්ලේ
සිරවුනු ඉකි වැලක
අප්පච්චිගේ හීල්ලුම
තවමත් රැයපුරා නොනැවතී නැගෙනවා
පුතේ නුඹ
අද එයිද හෙට එයිද
කියා උන්දෑ තවම
මළවුන්ගේ හැන්දෑවේ
කඩුල්ල තනි රකිනවා
අඳුරු මූසල මරණීය රාත්‍රියේ
පැමිණ රැගෙන යන්න ගිය
මගේ අහිංසක මල
තලා පොඩිකළ ලෝකයම
අහිංසකාරාමයේ අලුත් සුවඳැති මල් සොයනවා
පුතේ නුඹ අද හෙයිද හෙට එයිද
අපි තවම මඟ බලනවා
[සටහන- අතුරුදහන්වූවන් සිහිකර පාර්ලිමේන්තු වටරවුම අසල ඉදිකළ අහිංසකයන්ගේ ආරාමය ආසන්නයේ මල් පැළ ප්‍රදර්ශන පැවැත්වෙන බවත් මේ වන විට අහිංසකාරාමය මල් වෙළෙන්ඳන්ගේත් මල් පාරිභෝගිකයන්ගේත් පොදු වැසිකිළියක් බවට පත් වී ඇති බවත් පසුගිය දා රාවය පුවත්පත හෙළි කළේය.]
No comments:
Post a Comment