වාමවාදී අරගලය සහ ධනවාදී ජීවිතය

 

 

 

 

 

 

 

 

පෑනයි අවියයි,
ඇවිත් එකම මොහොතක
ලියන මේසය මතට
තනි රුල් කොළයි
මූනිස්සම් වැලයි එක්ක

අප්පච්චි අම්මයි,
එකම විට
මගේ මේසේ අභියස
ගෙදර හාල් තුනපහ
ඇබින්දක් නැතිලු
අප්පච්චිට දැන් බරවැඩ හොද නැතිලු
ඩීඑම්ඕ මහත්තය කීවලු
හදවත දැන් හුඟක් දුර්වලලු

නංගි,
දීග දෙන වයස
දෑවැද්ද
පෝරුවට නැගි ජයට මගුල්
කප්පරක් හුරතල් හීන ඇස්
එක් එල්ලේ බලා සිටිනවා
මා දෙස

මලය,
ඌත් දැන් ගජ ඉලන්දාරියෙක්
මටත් වඩා කර දඩු ඉස්සෙච්ච
දායාද ඉල්ලන්න ඇවිත්
උගේ ලොකු අයියා වන
මගෙන්

සයුරි,
ඇවිත් ඇත ඇයද
ජීවිතේ තීරණය ගන්න
මෙතෙක් දෑත් පටලා ගෙන ආ මග
දෙපැති බෙදෙන ඉමට
ඇයද බලා සිටී
මා තෝරන තුරු දිශානතිය

අංශු ඉඩැති
ඉදිකඩු තුඩැති
ජීවිත මුදුනත
එකම සැනින්
එක විටෙක
ජීවිත ඉඩ සොයයි
දායද ඉල්ලයි
හීන පතයි
ලොකු පුතාගෙන්
ලොකු අයියගෙන්
සුපෙමවතගෙන්

ගත යුතුමය
තීරණය
අරගලයද
ජීවිතය
සිහින ප්‍රර්ථනාද
අවියද
පෑනද

නෑතිනම්

නොකිලිටි හෘද සාක්ෂිය
දුප්පත් ජීවිතය නඩත්තුවට
උගස් කරනවාද
හොඳ මිලකට
හෙට